Et a tous ces barons uns et uns demandés,
Et il iestre venu, sor les chevaus monté.
« Sire, dient François, où est Rollans remeis ? »
« Par foi, dist l’empereres, Renaus l’en a mené.
Si l’a à Montauban là dedans enserré ;
Mais je vos pri, por Deu, issi com vos m’ames,
Que vos faites destendre et paveillons et trés.
Si irons Montauban plus pres avironer.
Chascun jor lor ferai novel asaut livrer.
Oliviers de Viane, l’oriflambe portes.
Richars de Normendie, avec l’ost en ires ;
Si guieres ma gent, je vos en pri, por Dé.
Je sui molt durement correceus et irés
Por Rollant, mon neveu, qui ensi m’a fausé. »
« Sire, dient François, ne vos desconfortes. »
Qui donc veïst destandre et paveillons et trés,
Et ces rices aucubes et chargier et trosser.[1]
Vienent à Balençon, si sunt oltre passé.
Et passent Montfaucon, si sunt acheminé.
Molt par fu grans li os, quant il fu asemblé.
Desi à Montauban ne volrent arester.
Charles a veü l’estre, si fait tendre son tré,
Et li rices barnages environ et en lé.
Les gaites s’aperçoivent des murs de la cité,
Et oient les chevaus henir et braidoner,[2]
Ces haubercs, ces escus et ces helmes soner,
La noise qui fu grans tot entor le reiné.
Il vienent à Maugis et si li ont conté :
« Dormes vos, biaus dous sire ? errament vos leves.
Là fors a molt grant jant, se tandent là lor trés.
Je cuit que çou est Charles et il et ses barnés,
Ki nos vient aseoir por no vivre gaster. »
Et quant Maugis l’oï, si s’est del lit levés ;
Uns eschapins chauciés, .i. mentel afublé,
Venus en est as murs, si a l’ost esgardé,
Page:Castets - La Chanson des quatre fils Aymon, 1909.djvu/691
Le texte de cette page a été corrigé et est conforme au fac-similé.
663
les quatre fils aymon
