Atant es vos les contes qui laienz sunt entré,
Et saluent le roi com ja oïr porrez :
« Dame Dex, nostre sire, qui siet en maïsté,
Sauve l’empereor qui France doit garder,
De par Rollant le conte, qui molt fait à loer.
Il vos mande, biax sire, ja ne vos ert celé,
Renaus l’a là dedens encor molt bien gardé.
Encor vos mande acorde, se faire le volez ;
Montalban vos rendra et vostre aigle doré,
Et trestote lor terre et lor grant ireté,
Et Rollant vo neveu et nos cuite clamé. »
« Name, dist Charlemaignes, voidiez me tost mon tré.
Vos fustes molt hardis qu’en osastes parler.
Ja ne seront à moi paié ne acordé,
Se je n’en ai Maugis devers ma part torné ;
Et se il le me rendent, bien soient acordé. »
Et li conte s’en tornent, [sens congié demander] ;[1]
Vienent à Montalban, laiens s’en sunt entré.
Encontre vait Rollans et Renaus li senez,
Et demandent duc Name : « Que aves vos trové ? »
« Sire, ce dist dus Names, orguel et crueté.
Ja ne seroiz à lui paié ne acordé,
Se Maugis, vo cosin, en fief ne li rendez. »[2]
« Par foi, ce dist Renaus, on n’en doit plus parler.
Pleuist à cel segnor qui en crois fu penés,
Que Charles fust çaiens avœc nos enserrés. »
Forment sunt li baron là dedens demené ;
Or ont tant atendu que il fu avespré ;
Maugis servi le nuit de vin et de claré.
Quant il orent mangié, les napes font oster.
« Renaut, ce dist Maugis, ales vos reposer,
Et je irai Charlon ainz mienuit enbler. »[3]
Et li lit furent fait, tot se vont reposer.
- ↑ 12517 Sic A C. L s’ont congié demandé.
- ↑ 12523 B enfin ne li rendez que Michelant préfère à en fief. — Le reste de sa note s’applique au vert 12537, mais le chiffre du v. a été omis.
- ↑ 12532 Ce vers est répété plus bas. Ici, je le supprimerai volontiers, car Maugis parle devant les barons ; mais, ce n’est pas une raison suffisante pour altérer le texte. De même je le maintiens au v. 12537.
