Devant lui en la sele, mais molt grant mont sanla ;
Mais je nel coisi mie, que covert l’avoit ja.
Un petit fu lassus, asez tost retorna.
Si essi de la porte, aincques puis n’i entra.
Je ne sai qu’il devint, ne quel part il ala. »
Quant Renaus li dus l’ot, molt s’en espaventa.
Molt s’aïre Renaus, quant il oï ce dire,
Maugis s’en ert alez où ert tot son remire,
Il li caï el cuer, trestot sanz oïr dire,
Que fuïz s’en estoit por la Charlemaigne ire ;
Dont plora tenrement, de parfont cuer sospire ;
Venus est as François, si lor commence à dire :
« Maugis s’en est fuïz, si a guerpi l’empire ;
N’osa le roi atendre, k’il nel feïst oçire,
Por ce que il l’a pris et mis en tel martire. »
Quant Aallars l’oï, parfondement sospire,
Et Guichars s’abaissa, k’il ne savoit que dire.
Qui que demaine dœl, Richars se paraïre :
Il a destor ses mains, son visage descire.
« Haï ! dist il, cosinz, que porrai de vos dire !
L’autre jor fusse morz à duel et à martire,
Se vos ne fussiez certes, je ne l’os pas desdire ;
Et por nos cors aidier, aves tote ceste ire
Vers le roi Charlemaigne ki justice Sezile. »[1]
Lors se leva en piés, envers le roi s’aïre ;
Si jura Damledeu et le cors de saint Sire
Que il l’estranglera, ja n’en aura remire.
Ja eüst pris le roi, mais Renaus le retire,
Et Ogiers et dus Naimes, si li ont pris à dire :
« Ahi ! cosinz Richars, car refraignies vostre ire.
Rollans le regarda, mais ainc ne volt mot dire ;
Ançois hauça la teste et durement sospire.
Qant menerent grant duel, onques n’oïstes graindre ;
Il ont droit s’il plorerent, que nul nes en doit plaindre,
Que soufraite en auront, ainz qu’il puissent ataindre,
Ensi com vos orez, se je ne m’en vœl faindre.[2]