Plus de .c. fois le va en un randon baisier.
Quant Richars a oï son neveu si parler,
Molt grant pitié l’en prent, si commence à plorer.
« Renaut, dist il, beax frere, or tost de l’atorner.
Ociez mon cheval, ne le vœl destorner.
Si dones mon neveu maintenant à disner ;
Molt l’a bien deservi, bon consel set doner. »
« Voire, dist Aallars et Guichars li bons ber,
Lequel ki vos plaira, si nos faites tuer,
Fors solement Baiart que tant devons amer.
Tantes foiz nos [a ja] nos viez fait sauver ;[1]
Mielz amons nos morir que icelui tuer. »
« Bien dites, dist Renaus, nel poroie endurer. »
Adont vont à l’estable, .i. en font acorer.
Que vos aconteroie, par le cors saint Omer ?
Les .iii. kevalz mangierent, ne porent demorer ;
Et quant il sunt mangié, ne sevent où aler,
Que Baiart n’oceissent por la teste colper.
Renauz fu à malaise, quant famine l’estraint.
D’ire et de maltalent fu molt muez et taint,
Et dist : « Dex ! que ferai ? ne fui mais si destraint.
Voir se dit qui se dit : ki cerf cace, cerf prent.[2]
Tant a cacié li rois que en [lasc] m’a enpaint,[3]
Dont escaper ne puis, ainz i sui si estraint.
Haï, las, doleros ! mal ait qui ne me plaint,
Quant cel laisai aler ki m’a çaienz ataint.
Ainz consel ne vol croire, si en sui molt destraint. »
Et Richars li escrie, ki durement fu tainz :
« Renaus, estes aaise ? dites moi por .i. Saint,
S’or aviez le roi ki ci vos a açaint,
S’en iroit il toz cuites que il ne fust destraint ? »
« Nenil voir, dit Renaus, trop me par a ataint.
Je le vos [liverroie] loialment sor toz Sainz. »[4]
Molt furent à malaise et furent soffraitoz.
