Page:Castets - La Chanson des quatre fils Aymon, 1909.djvu/753

725

les quatre fils aymon

Et Renaus fu laens en son maistre [manage].^[1]
M 373Richart fist desarmer, com omme de parage ;
Errant lo fist vestir par mont grant signorage.
« Richart, ce dist Renaus, or entent mon corage.
14190Charles a tort vers moi et a el cors la rage.
Par icel dame Dex qui me fist à [s’]ymage,^[2]
Se par vos n’en ai pais et de mal respitage,
Certes por soue amor i morres à viltage.
Jamais ne querrai pais nul jor de mon aage,
14195Que tant est plains d’orguel. Je lo tieng à viltage.^[3]
Et si sachies de voir, foi que doi mon visage,
Molt vos ferai dolant, qu’iestes de mon parage. »
« Sire, ce dist Richars, vos fereis vo corage.
Pris m’aveis en bataille et en vostre domage ;
14200Mais tant comme ge vive, ne puisse porter targe,
Ne faurai Charlemaigne à port ne à passage.
S’il a tort, c’est sor lui, n’a de moi fors l’omage. »

Molt parlerent ensamble, si com vos ai contei,
Et Renaus prent Richart, si l’a mis en fiertei,
14205Dedens sa maistre chambre où a de gent plentei,
Qui gaiteront son cors de bone volentei.
Quanque il demanda, li a on aportei.
Il y avoit eschés où il est deportés ;
La dame fu o lui, qui l’a reconfortei ;
14210As eschés jue à lui, sovent l’avoit matei.
Et li rois fu en l’ost, molt s’estoit dementei.
De Richart ot paor li vassax adurei
[Que il ne soit ocis et mis à grant viltei] ;^[4]
Mais molt est plains d’orguel et de grant cruau[tei],^[5]
14215Ne [lo] deigna requerre, savoir [ne] viaut vertei.^[6]

1. 14186 A leans en son demainne estage. M là sus en son mestre manage. L marnage.
2. 14191 Sic M. L a ymage.
3. 14195 M hontage.
4. 14213 L manque. Pris de M. A deux vers en un : De Richart qu’il ne soit ociz ou afolez.
5. 14214 Lettres rognées.
6. 14215 L lor... savoir viaut veritei. Mauvais sens, corrigé par Michelant, d’après M.