S’il rendent le castel, n’i quit faire mellée,
Ains que lor gent i soit morte ne afolée. »
Il y a envoié Garnier de Pierrelée.
Garnier y est alé seur le mule afeutrée.
Chil de laiens le voient, la porte ont desfremée ;
Et il y est entré, une cape afublée,
Vermeille d’escarlate [et de gris fu fourrée ;
Trueve le senescal] qui garde la contrée,
O lui [.xx.] chevaliers qui durement l’amerent.
Et li dus les salue com fil de boine mere :
« Et Dix vous saut, baron, li glorieus Sauveres. »
Respont li senescaus : « Dix vous saut, biax dous frere.
Dites si vo raison, qu’elle soit bien contée.
Ne sommez pas seür en icheste contrée
Qui sont [cil chevalier] qui ceste iaue ont passée. »
Et li dus li respont : « Ne quit faire chelée.
Chou est Karllez de Franche et sa gent honnerée.
Entrez est en Gascongne sor Yon l’emperere,
Pour chou que il rechete Renaut et ses .iii. freres.
Or vous mande [mes sire] à la chiere membrée,
Se ne rendez la ville, la guerre est ja levée ;
[Se rendez le castel, n’en quiert faire mellée]. »
Li senescaus respont raison desmesurée :
« Je ne pris .i. denier Karlle ne sa ponée,
Mais revoit en arriere en la soie contrée :
Et s’il atent Yon ne Renaut ne ses freres,
Il s’en ira arriere à maisnie privée. »
Et li dus respondi, s’a la teste crollée :
« Piecha l’ai oï dire, par l’apostre saint Pere,
Que pour son droit seignor rechoit on grant collée.
Or pens[t] cascuns de vous, sa teste soit armée,
Car en moult petit d’eure en verres la mellée. »
Li dus ist du castel sans nule demourée
Et vint devant le roy, s’a sa raison contée :
« Li senescaus vous mande qui garde la contrée,
Que ne prise .i. denier ne vos ne vo ponée ;
Mais rales ent arriere en la vostre contrée,
Que s’atendes Yon ne Renaut ne ses freres,
Vous en ires en Franche à maisnie privée. »
Quant l’entent l’emperere, s’a la coulor muée,
Il apelle ses homes, sa gent a escriée :
« Armes vous tost, barons, li fil de franche mere,
Assales le castel, n’aront gaire durée. »
Page:Castets - La Chanson des quatre fils Aymon, 1909.djvu/972
Cette page a été validée par deux contributeurs.
944
appendice
