« Gentis fix de baron, trop es asseüré.
Kallemaines de Franche est en ta terre entrés
A tous .lx.m. de chevaliers nombrés,
Et a pris Montbendel dont il ne vous set gré.
Les fossés fist emplir et le bourc embraser.
Rollant et Olivier poes plus pres trouver
As gués de Balenchon, [là ont tendu lor tref].
Là poes Olivier tous les membrez coper,
Prendre le neveu Karlle se assalir l’oses,
Car il sont oiseler et en riviere alé
Là dedens ta garenne lau nus hons n’ose entrer. »
Quant l’entendi Renaus, s’a Richart regardé,
Guichart et Aalart et Maugis le sené.
« Baron, che dist Renaus, quel conseil me donres
[De si fetes novelles com si oï aves ?] »
« Seignor, che dist Maugis, aparmain le sarez.
On l’en puet moult bien croire, par saint Denis le ber ;
[Li mes le vous a dit], plus a d’un mois passé,
Qu’envoiamez en Franche, c’est fine verité,
Que Charlemaigne avoit guerpi les vix barbé,
Pour les enfans a fait l’arriere ban mander.
Largement lor promet Gascongne le rené.
Rollant et Olivier sont si desmesuré
Qu’il ne quident nul homme en la crestienté
Qui les osast par mal une fois regarder.
Mais si ferons ancui, se croire me voles.
Faites mander vos hommez de par tous vos osteus,
Qu’il soient de lor armes garni et apresté,
Et si il [feront] lors quant [sera] commandé.
La grant voie du bos lez en [ferez] mener.
Dessi à Balenchon droitement les menes,
Puis regardes sor destre, si coisissies les trés
Je remandrai ou bos à tout .m. adoubés,
Et vous ires avant à vo riche barné.
S’Oliviers et Rollans est en riviere alé,
En la grande forest la ù nus n’ose entrer,
Sempres moult asprement calenge li metes.
Je vous secourrai bien, se mestier en avez.
Les oisiaus qu’il ot pris, veul avoir au disner. »
« Cousin, chou dist Renaus, bon conseil me donnez.
Issi le senti jou comme vous le loes. »
Il fist mander sez hommez de partout ses osteus
Que fussent de lor armez garni et conraé.
Page:Castets - La Chanson des quatre fils Aymon, 1909.djvu/975
Cette page a été validée par deux contributeurs.
947
appendice
