Page:Castets - La Chanson des quatre fils Aymon, 1909.djvu/986

La bibliothèque libre.
Cette page a été validée par deux contributeurs.
958
appendice

Toi ne caurra plus gairez qui en soit confondu,
130Mais que froissié en aiez ta lanche et ton escu,
Et seulement en aies .i. poi de sens eü ».
Apres parla Bertrans à la chenue barbe,
Li simez des barons qui Dame Dex mal fache :
« Gentis roys de Gascongne, pour Diu l’esperitable,
135Tes demande conseil, dont nus ne le set gairez.
Aussi chier a la guerre comme la pais fust faite,
Et se il n’i gaiegne, si n’i perderoit gairez.
Vous devez bien savoir dedens vostre corage
L’amor as fix Aimon que vous mar acointastez,
140Vous y aves perdu plus de plaine une balle
D’or fin et de besans et de bliaut de paille.
Si est Renaus molt boins chevaliers à [ses] armez.
Mais par son [grant] orgueil se mella il à Kalle
Son neveu li ochist dont il fist grant outrage.
145Il en vint en Gascongne, mais vous le rechitastes
Et par mauvais conseil vo seror li donnastes ;
Et frema chel castel el chief de ceste marche.
Ja le vient essillier nostre empereres Kalles.
Par le los de vos hommez à lui vous acordastes,
150Et si fu de Gascongne et senescal et garde.
Mais dus Aimez ses peres, à la chenue barbe,
Se prist à Olivier par merveillous contraire
Pour l’estrif d’un grant chine que il vit ou rivage.
Le clama losengier, voiant tout le barnage.
155Et li bers le navra de son branc en l’espaulle.
Droit en offri à faire o son riche barnage.
Vint s’ent à Montauban et Aalars li sage.
Puis ne fu il nul jour que ne guerroiast Kalle.
Dusques l’iaue de Loire i ot toute Franche arse.
160Kalles est en Gascongne o son riche barnage.
S’a assanlé o lui lez damoisiaus sans barbe.
Moult par vous doi peser, par Diu l’esperitable,
Quant par .i. tout seul homme estes en tel barate.
Tolles li vo seror, s[i] li donnes .i. autre
165Qui soit plus gentis hons et soit plus mesurable.
Par aucune maniere le delivres à Kalle.
Se vostre cors n’i est, ja n’i averez blame. »
Et dist li rois Yon : « Je sui pres que le fache. »