Tost et isnelement de ses frerez tourna
Et a pris un coutel, maintenant l’aguisa.
Venus est à Baiart en l’estable où esta.
Quant Baiars l’a veü, de joie sautela,
Pour l’amour son seignor grant joie demena.
Renaus, li fiex Aimon, voir plus n’i adessast.
Grant pité a eü Renaus, li fiex Aimon,
De Baiart son cheval qui valoit un donjon.
« E Diex ! che dist Renaus, qui estoras le mont,
Comment ochirrai jou mon destrier arragon ? »
Et Richars s’escria clerement à haut ton
« Par Diu, Renaus, dist il, mort sont ti enfanchon,
Se il n’ont à mengier, de verté le savons.
Car ochiez Baiart, et nous en mengerons. »
« Moult volontiers, biaus frere », li dus Renaus respont
Venus est à l’estaule à Baiart l’arragon,
Ferir le vaut el cuer du coutel à bandon ;
Quant devant lui se mist Baiars à genoullons.
Quant Renaus l’a [veü], au cuer en ot frichon,
Il ne l[e] touchast puis pour tout l’avoir du mont.
Mais un bachin a pris Renaus li fiex Aimon,
Du sanc de Baiart prist, de verté le savon,
El bachin l’emporta, n’i fist arrestison.
Arriere est repairiez sus el maistre dongon,
Le sanc a fait boulir dedens un cauderon,
Puis mengierent li conte et li dui enfanchon.
E Diex ! or sont li conte en grant destrussion.
Seignor, pour l’amour Diu, et que vous mentiroie ?
Tant out sainié Baiart, duremem afebloie ;
Trop souvent l’ont sainié par le fain qu’il avoie.
Du sanc mengua la dame qui de fain se marvoie.
« Baron, che dist Renaus à basse vois et coie,
Dame Dix nous consaut qui tout le mont ravoie.
Se jou de chest castel au plain m’en avaloie,
Par le vertu du chiel ne sai où vertiroie.
Kallez nous fera pendre qui as tentes s’ombroie.
Laiens ot [.i.] viel homme qui de vielleche ploie.
Li preudons ot Renaut, de pité en larmoie :
« Baron, dist li viellars, ne vous esmaiez mie.
Se vous me volez croire, par Diu le fil Marie,
Je vous metrai là hors à sauve garantie,
Tout maugré Kallemaine à la barbe flourie.
Là jus a une bove de grant anchisserie
