CCXLVII.
AUTRE-FOIS ay j'esté sous le joug inhumain
Du peché asservi, mais tu m'en sanctifie
Mais tu m'en affranchis, mais tu m'en justifie
Au nom du Createur ton Pere Souverain.
En toi seul j'ai posé le fondement certain,
Et la pierre du coing sur lequel j'edifie
Et d'autre que de toy je ne me glorifie,
Qui me prens en tutelle & conduis sous ta main.
En toy seul nous avons grace paix & victoire
Remission soulas rejouissance & gloire
Et rompons des Enfers le pouvoir depité,
Semblablement aussi de ta grace j'espere
Au jour de mon depart obtenir de ton Pere
La coronne & le pris de l'immortalité.
CCXLVIII.
NOUS avions tous peché desnuez de l'honneur
De la gloire de DIEU, mais nous prenant en grace
Il nous justifia par la seule efficace
De la mort de son filz nostre unicque Seigneur
Moise des Hebrieux fidelle gouverneur
Nous anonca la loy de rigueur & menace,
Mais la grace en noz cueurs par JESUS à pris place
De nous envers son PERE Eternel moyenneur.
O dous Agneau c'est toy qui r'appointant les choses
Qui sont dedans les cyeus & sous la terre encloses
Par l'alme effusion de ton sanc precieus
Toutes perfections as receu de ton Pere,
Pour affronchir le seau de nostre vitupere,
Immolant en la crois nos forfais vicieus.
