CCCLXXXI.
J’ay voulu voyager, à la fin le voyage
M’a fait en ma maison mal content retirer
En mon estude seul j’ay voulu demeurer,
En fin la solitude a causé mon dommage
J’ay volu naviguer, en fin le navigage
Entre vie & trespas m’a fait desesperer
J’ay voulu pour plaisir la terre labourer
En fin j’ay mesprisé l’estat du labourage
J’ay voulu pratiquer la science & les ars
En fin je n’ay rien sceu, j’ay couru le hasars
Des combas carnaciers, la guerre ore m’offence
O imbecillité de l’esprit curieus
Qui mescontent de tout de tout est desireus,
Et douteus n’a de rien parfaite connoissance.
CCCLXXXII.
Tormenter le vivans & diffamer le mort
Abhorrer DIEU de ceur & le servir de bouche
Aimer la chastete & polluer la couche
Du mari de sa femme aus ruses mal accort
Annoncer la justice & maintenir le tort,
Estre dous d'apparence & dans l'ame farouche
Estimer le scavoir avancer une souche,
Feindre le repenti & vivre sans remort
Me fait croire & penser que l'estat de ce monde
Fors à l'exterieur autre part ne se fonde
Preferant l'apparence ou point de verité,
Voila en quelle erreur le fol humain se plonge
Qui dormant en enfer sa damantion songe
Trouvant a son resveil misere & vanité.
