une garde exacte, qu’ils ne s’eschappent point. Que s’il est vray qu’ils ayent commis l’aultre faict concernant le sieur de la Lane, ainsi que nous l’escrit ledit sieur de la Force, nostre intention est qu’apprès quelque violence deheuement recognue, soit par ledit sieur de la Lane ou aultrement, par devant les officiers de la justice, vous iceulx lesd. rendiez aud. sieur de la Force, s’il les répète, en conformité de ce que nous lui escrivons. Et comme en tout cas, il est besoing d’estre bien sur ses gardes contre toutes surprises, vous redoublerez vos soings, ferez appeler punctuellement tous les retrahans, et entrer promptement audit Jonvelle les cent hommes que nous vous escrivismes dernièrement, pour la solde desquels aussi bien que de ceulx du sieur de Raucour nous ferons délivrer argent sans faulte à l’admodiateur (de la seigneurie) Grosjean, que nous attendons icy au premier jour pour cest effet. Et cependant les habitans dud. Jonvelle leur feront ce peu de crédit, ainsi que nous leur ordonnons et à vous et à eulx de ne souffrir désormais audit Jonvelle aucuns officiers ny soldats estrangers ; et disposer doulcement les aultres gens esménagés y réfugiés de se retirer plus avant dans la province, tant pour leur propre bien et asseurance que pour nostre repos particulier, qui nous doit toucher de plus près.
Thons, 2 mars 1636. — De la Lane, lieutenant du colonel Gassion, à son officier de Mitry, retenu blessé a Jonvelle.
Monsieur, l’affaire dont m’avez escript touche tellement mon honneur et celluy de mes officiers, estant envoyé par eulx pour le service du roy, pendant lequel voyage j’ay receu un si grand affront, qu’il ne se peult réparer par quelque satisfaction que ce soit. Toutefois, puisqu’ils se soubmettent à quelque honnesteté, non point approchante à la centiesme partie de l’injure que nous en avons receu moy et les miens, je remect le tout à vostre prudence et vous asseure ce que vous en ferez, je le tiendrai à faict.
DE LA LANE.
