1230, Juin. — Au camp devant Ancenis.
Déclaration de forfaiture rendue par les barons français, en présence du roi de France Louis IX, contre le comte de Bretagne Pierre Mauclerc.
Archives nationales, J//241/A, pièce no 5 (AE/II/231)
Galterus Dei gratia Senonensis archiepiscopus, Galterus eadem gratia Carnotensis et Guillelmus Parisiensis episcopi, F. (Ferrandus) comes Flandrie, Th. (Theobaldus) comes Campanie, comes Nivernensis, comes Blesensis, comes Carnotensis, comes Montisfortis, comes Vindocinensis, comes Rociaci, Matheus de Montemorentiaco Francie constabularius, Johannes de Suessione, Stephanus de Sacro Cesare, vicecomes Bellimontis, et alii barones et milites quorum presenti scripto supposita sunt sigilla, universis tam presentibus quam futuris ad quos pervenerit presens scriptum, salutem in perpetuum. Notum facimus quod nos, coram karissimo domino nostro Ludovico rege Francie illustri, judicavimus unanimiter quod Petrus, quondam comes Britannie, propter ea que eidem domino regi forisfecerat, que pro majori parte coram omnibus nobis ibi dicta fuerunt, ballum Britannie per justitiam amisit, et quod barones Britannie, et alii qui ei fecerunt fidelitatem vel homagium ratione illius balli, sunt penitus absoluti et quiti ab illa fidelitate et illo homagio, nec tenentur ei obedire vel aliquid pro eo facere quod pertineat ad rationem illius balli. In cujus rei testimonium, presens scriptum fecimus consignari nostrorum impressionibus sigillorum. Actum in castris juxta Ancenisium, anno Domini M° CC° tricesimo, mense junio.
