leur passe devant les yeux. Leur impatience ne pouvant souffrir de retardement, & leur mollesse estant ennemie de toute sorte de peine ; pour s’espargner les longueurs de la recherche, & les difficultez du choix, ils mettent en œuvre les instrumens les plus proches, & gardent, par coustume, ceux qu’ils n’avoient pris que, par rencontre.
Pour conclusion, cette Faveur qui s’esleve si haut, sans avoir de fondement, ne seroit-ce point plustost un effet de l’amour propre, & une complaisance, que personne ne refuse à ses opinions ? Ne seroit-ce point nostre honneur, que nous croyons engagé, dans la perfection de nostre Ouvrage ? Ne seroit-ce point un levain de cét orgueil naturel, caché dans l’esprit des hommes, & qui enfle particulierement le cœur des Rois, quand il est question de maintenir une faute qu’ils ont faitte, & de ne pas avouër qu’ils peuvent faillir ?
Quoy que puisse estre cette Faveur, ce
