D’entre les bons si faitte gent sortir,
Se pris et los estoit a départir.
Ne en leurs dis il n’a nul mot de voir,
Grans vanteurs sont, n’il n’est si grant maistrece
Qu’ilz n’osent bien dire que leur vouloir
En ont tout fait, hé Dieux ! quel gentillece !
Comme il siet mal a noble homme a mentir
Et mesdire de femme ! et vrayement[1]
Telle gent sont drois villains purement,[2]
Et devroit on leur renom amortir,
Se pris et los estoit a départir.
XIII
Dieux ! que j’ay esté deceüe
De cellui, dont je bien cuidoie[3]
Qu’entièrement s’amour fust moye !
A tart me suis aperceüe.[4]
Or sçay je toute l’encloüre[5]
Et comment il se gouvernoit :
Une autre amoit, j^en suis seiire,
Et si beau semblant me monstroit
Que j’ay ferme creance eüe,
Qu’il ne desirast autre joye
Fors moy ; mais temps est que je voie
La traïson qu’il m’a teüe ;
Dieux ! que j’ay esté deceüe !