Page:De la transformation metallique.djvu/16

Celle Dame je vous affie:
205Car aussi tost que Dieu eut faitz
Les Elemens qui sont perfaictz,
L’Eaue, l’Air, la Terre, et le Feu,
Nature en tout parfaicte fu.
Sans Nature ne peult plus croistre,
210Dedens la Mer la petite oistre.
Nature est mere à la ronde
De toutes les choses du monde.
Noble chose est que de Nature.
Moult bien y pert à la figure
215De l’homme, que Nature ha faites,
En quoy de rien ne s’est meffaite:
Aussi fait il en plusieurs choses,
Qui par Nature sont descloses:
Oyseaux, arbres, bestes, fleurettes,
220Du tout par Nature sont faites:
Et ainsi est il des metaulx,
Qui ne sont pareilz ny esgaulx.
Car par elle mesme se font,
Dedens la terre bien profond:
225Desquelz plus à plein conteray
Quand Nature te monstreray,
Laquelle je veulx que tu veoye,
Affin que mieux suyve sa voye
Et son sentier en la tienne œuvre:
230Car il fault que la te descoeuvre.
     Ainsi que telz propos tenoit,
Je veis Nature qui venoit.
Et alors, sans faire delay,