iournellement offrir vne choſe viſible & ſans ame pour noſtre redemption : laquelle offrande vne fois faicte changent : voire mettent à neant la pure et ſaincte inſtitutiõ de Ieſus Chriſt, quãd comme enflez & ſuperbes en leur eſperit, viennent inuenter & controuuer telles ceremonies, telles reiterations de ſacrifices, comme ſi Ieſus Chriſt n’auoit eſté aſſez ſuffiſant pour faire noſtre redemption : mais en falut faire ven aultre contre toute la ſaincte eſcripture, faiſans idolatrer le paoure peuple, qui adore le pain & le vin comme ſon propre Dieu : lequel n’a point ſon habitation és choſes faictes de main d’homme. Et ne veult außi eſtre ſerui ne adoré en choſes faictes par artifice ne induſtrie humaine.
Mais toy (plus ſage que Dieu) luy feras vne belle ymage de bois, de la moytie en cuiras ton pot et ta chair, de l’aultre en forgeras vn Dieu pour l’adorer & ſeruir, luy demandant ayde & ſecours : de peu de blé feras du pain, l’vne partie donneras aux paoures comme Dieu commande, de l’aultre qui est deffendue feras vn Dieu pour l’adorer, mãger & deuorer. O quel ſeruiteur, mangeant ſon maiſtre, quel ſeruice on luy fait, quelle adoration : bien recommandée toutefois,
