lequel perſonne ne peut dõner ſinõ le ſeul Dieu, donnãt ſon ſainct eſperit, il ne peut eſtre receu que dignemẽt. Car il fait dés impurs et mal netz netz, dés indignes dignes, lés purifiant et ſanctifiant par Foy, leur dõnant ſon ſaĩct eſperit. Auſſi mãger la chair et boyre le ſang de Ieſus Chriſt n’eſt autre choſe que fermemẽt croyre, qui iceluy noſtre benoiſt ſauueur a dõné ſon corps, ſa chair, ſa vie, & a repandu ſon ſang pour noſtre ſalut. Vrayemẽt cecy ne peut eſtre faict indignement & en iugemẽt, mais en ſalut. Car ceſte Foy purifie lés cœurs, pource q̃ Ieſus Chriſt habite par Foy au cœur du croyant. Ce mãger donc et croyre eſt vne meſme choſe : car nous n’auons pluſieurs moiẽs pour eſtre ſauuez, il ny a qu’vn c’eſtaſſauoir la Foy que auõs en Ieſus Chriſt.
Cecy dõne bien entendre l’euangeliſte S. Iehan en pluſieurs paſſages, parlãt touſiours d’vn meſme eſperit. En vn paßage il dit ainſi. Qui croit en moy a la vie eternelle, et ie le reſſuſciteray au dernier iour : En l’aultre paßage il dit. Qui mãge ma chair et boyt mõ ſang, a la vie eternelle, et ie le reſſuſſiteray au dernier iour. En cecy on voit aſſez apertemẽt manifeſtemẽt et ſimplement eſtre dicte vne meſme choſe de la Foy, et de mã-
