cordes & bruslemẽs de piedz auec huyle bouillãt leur ont faict cõfeſſer q̃ la vierge Marie mere de Ieſus eſtoit vne putain : et eſtãs hors dés tormẽs horribles et eſpouuentables à pẽſer, diſent le cõtraire. Mais incõtinẽt ſont plus tormẽtez et tyrãnizez que paravãt, affin que cés cruelz ayent couleur de lés faire mourir, pour auoir leurs biẽs en cõfiſcation. Cõme cés ãnées paßées auõs veu lés exẽples par ce maudict moyne de Roma : deſquelles choſes le Roy a eſté aultrefois plus ãplement informé, pour mettre ordre à telles iniuſtices : qui ſera quand il plaira à Dieu luy faire la grace. Puis que dés aultres en ſomme auõs parlé viẽdrõs à la loy papale, ou aultrement nõmée faulſemẽt chreſtiẽne, ſans q̃ perſonne (ſ’il luy plaiſt) ſ’offenſe : veu q̃ ſelõ la verité declairée, ou à tout le moĩs en partie. Car n’eſt à moy n’a aultre fẽme la pouuoir aſſez ſuffiſãmẽt deſpaĩdre et declairer, voyant l’enormité et abominatiõ d’icelle. Vous priãt lire et entẽdre auant que iuger. Car ſouuẽtesfois loniuge ſans ꝑtie ou ſans auoir leu le ꝓcés, baillãt ſentẽce digne d’appellatiõ. Et poutãt ſi diligẽment voulez entẽdre la trouuerez ſans cõparaiſon plus eſtrãge, ſuperſtitieuſe, hors de la foy et chreſtienté q̃ null aultre. Ce nonobſtãt ſõt prõptz à mal dire et à ꝑſecuter lés aultre.
