trouuerez plus ãplement q̃ ie ne dy. Car ne ſçauroye eſcrire & declairer lés grandes folies, meſchancetez & horribles blaſphemes qui ſont eſcriptz en leurs liures & decretz : car außi n’est hõme qui le ſceuſt aſſez deuemẽt declairer. Commẽt le fera dõc vne femme ? Et pourtãt ſoyez diligẽs de bien examiner lés textes & la cõſequẽce d’iceux, & verrez ce que ie dy eſtre veritable. Et ꝑ cõſequẽt auoir mal veſcu et cheminé ſelon chreſtienté : cõme aſſez clairemẽt pourrez entendre ſeulement par troys raiſons, leſquelles deburoyẽt principalemẽt eſmouuoir le fidele à fuyr ceſte meſchãte loy papale. C’eſtaſſauoir, en ce qu’ilz renõcent la mort & paßiõ de Ieſus, quãd par vne aultre redẽption veulẽt racheter le paoure peuple : lequel a eſté racheté par le precieux ſang de Ieſus vne ſeule fois. Mais eux non contẽs d’icelle redẽption, en font vne aultre de pain et de vin ſecrettemẽt en leur canõ. Qui est celuy qui ne ſe tiẽne trop plus q̃ cõtent d’auoir payé vne fois vn debte ? mais voulãt ſatiſfaire de rechef au ſecõd, on renõnce au premier. Et ne fault cõtrouuer excuſe en ce qu’ilz diſẽt, qu’ilz le font en la memoire de la mort et paßiõ de Ieſus chriſt : car ilz ſont mẽteurs, ilz le font en memoire de la
