vierge Marie, mere de Dieu (cõme ilz diſent) et de Ieſus Christ, & de pluſieurs aultres : cõme est cõtenu en leur cõmunicãtes & memoriã facientes. C’eſtaſſauoir, en memoire de Clite, de Griſogone, de Coſme & de Damien. L’aultre raiſon, en ce que nõ ſeulemẽt trõpent, ſeduiſent & pillẽt le paoure peuple : mais pires que Turcz et infideles, cõme chiens enragez font adorer l’aduerſaire & ennemy de Dieu. Et veulẽt que par leurs tyrãnies il ſoit adoré. Car tout ainſi que Sathã a voulu eſtre adoré de Ieſus ſur la mõtaigne luy mõſtrant lés royaumes de la terre, promettãt lés luy dõner, ſi en ſe proſternãt le vouloit adorer : außi font ceux cy à ceux qui le veulẽt ſeruir ſuyure, et hõnorer. Tu le voys aſſez apertement en ceux qui veulẽt preſcher puremẽt Ieſus et ſa parolle, comme ilz ſont dechaſſez dés cours dés roys, princes et ſeigneurs. Mais en abiurãt et retournãt baiſer la pantouffle de ce grãd ſerrurier aduerſaire de Ieſus, ſont veneficiez, prebendez, rentez, coronnez & mittrez : voire qui pis est, ſoubz vmbre de l’euangile. Cõme ſi toy royne, & lés aultres princes et ſeigneurs vouloient entretenir telle vermine ſur la terre, ce que ne puis bõnemẽt croyre estre voſtre vouloir. Mais (diſẽt
