telles choſes aduenir, à ceux à qui Dieu faict grace, de vouloir eſcrire, dire, preſcher & annõcer ce meſme que Ieſus & ſés Apoſtres, ont dict & preſché. Nous voyons que toute la terre eſt remplie de malediction, & lés habitans d’icelle troublez : voyans lés grandz tumultes, debatz, diſſentions, & diuiſiõs lés vns cõtre lés aultres, plus grãdz q̃ iamais on ne vit ſur la terre : groſſes enuies, noiſes, rãcunes, malueillãces, auarices, paillardiſes, larrecins, pilleries, effuſiõ de ſang, meurtres, tumultes, rauiſſementz, bruſlementz, empoyſonnemẽtz, guerres, royaumes contre royaulmes, nation contre nation. Brief, toute abomination regner. Le pere cõtre le filz, & le filz contre le pere : la mere contre la fille, & la fille contre la mere, voyre iuſques à vendre l’vn l’autre, la mere desliurer ſa propre fille à toute meſchanceté. Tellement qu’il ny a bien peu, au regard de tant de gentz qui ſont ſur la terre, qui vrayement ſçachent comment ilz doibuent viure, veu telles choſes eſtre aduenues, entre ceulx qui ſe nõment chreſtiens. Et de cecy perſonne n’oſe dire mot : car l’vn veult cecy eſtre faict, l’autre cela : l’vn vit bien (ainſi qu’il dit) l’aultre mal, l’vn eſt ſage, l’autre fol, l’vn
