penſe ſçauoir, l’aultre ne ſçait rien, l’vn tient cecy pour bõ, l’aultre cela. Brief, y ny a que diuiſion. Et fault neceſſairemẽt, que l’vn ou l’autre viue mal. Car il ny a qu’vn Dieu, vne FoyEph. 4. vne Loy, et vn bapteſme. Et pourtant ma treſhõnorée Dame, vous ay bien voulu eſcrire, nõ pas pour vous enſeigner : mais affin que puißies prẽdre peine, enuers le Roy voſtre frere, pour obuier à toutes cés diuiſions, qui ſont regnantes és lieux, places, et peuples, ſur leſquelz Dieu l’a commis pour regir & gouuerner : et außi ſur lés voſtres, que Dieu vous a dõné, pour y pourueoir & donner ordre. Car ce que Dieu vous a donné, & à nous femmes reuelé, non plus que lés hõmes, le debuons cacher & fouyr dedens la terre. Et combien que ne nous ſoit permiz de1. Tim 2. preſcher és aſſemblées & egliſes publiques : ce neãtmoĩs n’eſt pas deffendu, d’eſcrire et admoneſter l’vne l’aultre, en toute charité. Non ſeulemẽt pour vous, ma dame, ay voulu eſcrire ceſte Epiſtre : mais außi pour donner courage aux aultres femmes detenues en captiuité : affin q̃lles ne craingnent point d’eſtre deſchaßées de leurs pays, parãs & amys, cõme moy, pour la parolle de Dieu. Et principallement pour lés paouures
