Cette page a été validée par deux contributeurs.
femmellettes, deſirans ſçauoir & entendre la verité : leſquelles ne ſçauent quel chemin, quelle voye doibuent tenir. Et affin que deſormais ne ſoyent en elles meſmes ainſi tormentées & affligées, ains pluſtoſt reſiouyes, conſolées, et eſmeues à ſuyuir la verité, qui eſt l’Euangile de Ieſus Chriſt. Leq̃l iuſq̃s à preſent a esté tant caché qu’on n’oſoit dire mot : et ſembloit q̃ les femmes ne deuſſent riẽ lire n’entẽdre és ſainctes lettres. Qui eſt la cauſe principale, ma Dame, que ma eſmeu à vous eſcrire, eſperãt en Dieu, que doreſenauant lés femmes ne ſerõt plus tant meſpriſées comme par le paſſé. Car Dieu chãge en bien de iour en iour le cœur dés ſiens. Lequel ie prie que’n brief ſoit ainſi par toute la terre. Amen.
