Page:Du Bellay - Œuvres complètes, édition Séché, tome 3.djvu/23

La bibliothèque libre.
Cette page a été validée par deux contributeurs.
11
Antiquitez de Rome

Qui jusqu’icy se sont tenus cachez
Sous les monceaux de ces vieilles ruines.

XX

Non autrement qu’on voit la pluvieuse nuë
Des vapeurs de la terre en l’air se soulever,
Puis se courbant en arc à fin de s’abreuver,
Se plonger dans le sein de Thetis la chenuë,
Et montant de rechef d’où elle estoit venuë,
Sous un grand ventre obscur tout le monde couver
Tant que finablement on la voit se crever,
Or’ en pluye, or’ en neige, or’ en gresle menuë ;
Ceste ville qui fut l’ouvrage d’un pasteur,
S’elevant peu à peu, creut en telle hauteur,
Que Royne elle se vid de la terre et de l’onde :
Tant que ne pouvant plus si grand faix soustenir,
Son pouvoir dissipé s’écarta par le monde,
Monstrant que tout en rien doit un jour devenir.

XXI

Celle que Pyrrhe et le Mars de Lybie
N’ont sceu donter, celle brave cité
Qui d’un courage au mal exercité
Soustint le choc de la commune envie,
Tant que sa nef par tant d’ondes ravie,
Eut contre soy tout le monde incité,
On n’a point veu le roc d’adversité
Rompre sa course heureusement suyvie.
Mais defaillant l’object de sa vertu,
Son pouvoir s’est de luy mesme abattu,
Comme celuy que le cruel orage
A longuement gardé de faire abbord,
Si trop grand vent le chasse sur le port,
Dessus le port se voit faire naufrage.

XXII

Quand ce brave sejour, honneur du nom Latin,
Qui borna sa grandeur d’Afrique, et de la Bise