Mieus ne m’en poroit avenir,
Car j’en sui ostés de tristour :
J’ai pensée, etc.
Car vous estes voir, sans mentir,
De toutes dames le millour
Et trestous biens a vous s’emploie.
J’ai pensée, etc.
nsi Melyador s’esbat,
Qui en le contrée s’embat
Ou messires Camelz converse.
Plaisance s’est en soi aherse
Moult grandement en chevaucant,
Car en ce matin chanta tant
Que ses varlès, bien le sachiés,
En estoit tous esmervilliés f. 57 c
Comment qu’il li fesist grant bien.
Melyador, en son maintien,
S’esbanoia de grant corage.
Or entra dedens .i. bocage,
Entour heure de miedi ;
Desous .i. cesne deschendi,
Qui estoit a merveilles grans
Et grant ombrage entreprendans.
Si tost qu’il ot mis piet a terre,
Ses varlès vint son cheval querre ;
Si le loia .i. peu en sus,
Et puis sus l’erbe s’assist jus,
Loing de Melyador arriere,
Ensi que le get d’une piere.
Sitretos comme il fu assis,
Il s’est si tres fort endormis
Que, pour bouter ne pour huchier,
On ne le peuist esvillier.