Sachiés qu’il le trest a meschief ;
Tant fist toutes fois qu’il le reut.
Messires Feughins ne se veult
Astenir qu’il ne venist la.
Quant venus fu, il s’abaissa
Et li sambla a son avis,
Quant il regarda ens ou vis
Le chevalier qui la gisoit,
Que Savare ses freres soit :
Adont li est li sans cangiés. f. 70 b
Tantost est jus sallis en piés
Et vient erranment sus Savare,
Sans querre empeschement ne bare,
Et voit clerement que c’est il,
Et que navrés est en peril :
Lors cuide moult bien foursener.
Son hÿaume fait lors oster,
Et puis dist : « Savare, biau frere,
« Ceste cose m’est moult amere,
« Quant je vous voi en ce parti. »
Et quant Savare devant li
Voit son mainsnet frere Feughin,
Si parolle et li dist, a fin
Que il ne soit trop destourbés :
« Feughin, Feughin, ne vous doubtés,
« Je croi que garde n’ai de mort
« Et, se je moroie, a mon tort
« Est, voir, quant a vous jousté ay
« Et vostre nom ne demandai.
« Se je muir, je le vous pardonne. »
A ces parlers, Feughins ordonne
Comment il en sera portés,
Et s’est .i. peu reconfortés
De ce qu’il l’a oÿ parler.
Bien dist qu’il l’en convient aler
A .i. chastiel bien priès de la.
Page:Froissart - Méliador, tome 2.djvu/9
Le texte de cette page a été corrigé et est conforme au fac-similé.
5
Méliador
