tilzhommes du pays à qui j’en ay donné charge y feront tout debvoir. J’ay esté bien ayse et vous remercye de ce qu’avés pourveu au payement de la garnison de Montsegur ; et encores que j’ay faict exprès commandement et injonction au capitaine Meslon de faire vivre les soldats comme il appartient, au support et soulaigement des habitans, et mesmes des Catholiques, je ne fauldray de luy rescrire et reiterer mes commandemens pour faire cesser toute occasion de plaincte. Quant au reffuz et difficultez du sr de Lesignan, vous ne sçauriez croyre le desplaisir que j’en ay ; qui est cause que, vostre lettre receue, j’ay prins occasion de luy escrire aux fins de me venir trouver. Qui ne sera sans luy representer voz raisons et aultres que j’y adjousteray pour tascher à le faire condescendre. Cella toutes fois ne peut ni ne doibt servir de pretexte quelconque aux detempteurs de mes maisons et chasteaux pour differer à les rendre, comme ilz doibvent, au commandement que vous leur en ferez. Car le faict de Pemyrol ne leur touche de rien, et ne porte prejudice ne dommaige qu’à ceulx de la Religion, en ce qu’estant privez de Perigueux, ils sont en attente d’une aultre seureté. Si on se veut plaindre de la compaignie du cappitaine Belsunce, pour ce qu’elle tient les champs, j’avois avec occasion desiré qu’elle allast loger à Ste Baseille, en attendant qu’elle peust entrer au dict Pemyrol. Vous m’avez faict entendre par vostre precedente une aultre difficulté qui ayderoit encores à retarder l’entrée de la dicte compaignie au dict Pemirol, à cause des conditions faictes pour l’assignation et payement de la somme de cinquante mil escuz, tout aultrement que n’avions convenu par ensemble ; mais j’espere que vous moyenerez à y pourveoir, comme je vous en ay pryé par mes dernieres, et que ce pendant vous ne lairrez de continuer les effectz de vostre bonne affection en ce qui reste de l’execution de l’edict, et mesmes en la reddition de mes
