demeuré trez satisfaict de son entrevue, et croy-je qu’elle produira beaucoup de fruict. Vous verrés la lettre generale que j’escris aux esglises de vos cartiers, de laquelle vous faires part à toutz ceulx que vous cognoistrés estre besoin. Je m’en revay à Sainct Jehan, et de là à la Rochelle, resolu de sejourner en ces cartiers de deçà jusques à la fin du moys prochain, affin d’oster le plus qu’il me sera possible les occasions de deffiance. Tenés moy adverty de tout ce qui se passera par delà ; et je prieray sur ce le Createur, Monsr Scorbiac, vous avoir en sa garde. De Mesle, ce iiije apvril 1582.
Orig. — Arch. de M. le comte H. C. de Meslon. Envoi de M. le secrétaire général du département de la Gironde.
À MONSR DE MESLON,
Monsr de Meslon, J’ay veu par vostre lettre les excès, desordres et entreprinses que font et commettent de par delà et à l’entour de Monsegur les turbulens et ennemys de la paix et tranquillité publicque. De quoy je me plains à la chambre de l’Edict, establye en Guyenne et ville de Bordeaux, afin de faire informer et proceder contre eulx par pugnition exemplaire. Dont je ne fauldray aussy d’escrire à monsr le mareschal de Matignon, qui doibt estre à present à Bordeaux. Et encores que je ne croye pas les effectz de plusieurs menaces qu’ilz font, touteffoys je suys d’advis que vous ne laissyez de faire faire aussy bonne et estroicte garde que jamais, sans neantmoins attempter chose quelconque contre l’edict ; estant fort content, et vous sçachant fort bon gré de la vigilance et bon debvoir que vous avez montrés contre les entrepreneurs qui ont voulu entreprendre contre vous ; qui debvez pour ceste occasion vous en deffyer d’aultant plus, afin qu’ilz ne taschent de retrouver la commodité qu’ilz ont perdue ; comme je crois vraysemblable qu’ilz en feront tous leurs
