Cette page n’a pas encore été corrigée
Tout peuple, & toute nation
(Dans l'humaine condition)
Toute gent, pour superbe, & grave,
Les meres des Barbares Roys,
Et les Tirants les plus adroits,
Sous toy ont leur puissance esclave.
Craignant que d'vn pied curieux
D'vn changement iniurieux,
Tu ne verses ta voulte ronde,
Ou que le Peuple ses harnois
Reuestant ne couure les bois
De soldars & la plaine, & l'onde.
Mais on voit marcher deuant toy,
Du Destin l'indomtable loy,
Qui dessouz sa largeur enferme,
Et guide de cest Vnivers,
Le haut, le bas, & le travers,
D'vn vouloir inmuable & ferme.
L'esperance & la rare foy,
Du pauure veut estre avec toy,
Te desirant pour sa compagne,
Qui quittes les riches Palais
En mouuant tes talons eslés,
Pour fouler la basse campagne.
