| 196 | L’ALCORAN. |
qu’ils trouverront veritable ce que leur ſeigneur leur a promis ? Les impies diſent que ce n’eſt que ſortilege & enchantemens ; Certainement Dieu eſt voſtre ſeigneur qui a creé le Ciel & la Terre en ſix jours, & s’eſt aſſis en ſon throſne diſpoſant de toute choſe, perſonne n’intercede pour ſon prochain ſans ſa permiſſion, il eſt voſtre Dieu & voſtre ſeigneur, adorez le luy ſeul, ny penſerez-vous pas ? vous ſerez tous un jour aſſemblez devant luy, il promet avec verité qu’il fera mourir les hommes & les fera reſſuſciter pour recompenſer ceux qui auront crû en ſa loy, & qui auront fait de bonnes œuvres, les infidelles bevront un breuvage boüillant, & reſſentiront de grands tourmens à cauſe des leur impieté ; C’eſt luy qui a donné la lumiere au ſoleil, & la clairté à la Lune, qui a creé les ſignes pour cognoiſtre le nombre des années, le compte des mois, & de tout ce qu’il a creé, ces choſes enſeignent avec verité les miracles de la divine Majeſté à ceux qui les ſçavent cognoiſtre, la difference du jour & de la nuit, & ce que Dieu a creé au Ciel & en la Terre, ſont des marques de ſon unité à ceux qui ont ſa crainte devant les yeux. Ceux qui croyent qu’il n’y a point de reſurection, ceux qui ont mis leur contentement dans les biens de ce monde, ceux qui ſe ſont confiez en leurs richeſſes, & ceux qui ont ignoré les commandemens de Dieu ſeront precipitez dedans le feu d’Enfer à cauſe de leurs pechez, & les vray-croyants ſeront conduits par ſa divine Majeſté dans
