| 492 | L’ALCORAN. |
butin, il vous l’a donné, & vous a delivrés des mains du peuple, cela ſervira de ſigne de ſa toute-Puiſſance aux vray-croyans ; il vous conduira au droict chemin ; perſonne autre que vous ne pouvoit faire cette conqueſte, il ſçavoit bien que ce butin n’eſtoit pas pour d’autres ; il eſt tout-Puiſſant, ſi les impies vous combattent, il fuyront, ils tourneront le dos, & ne trouveront perſonne qui les proteges ; Obſervez la loy de Dieu contr’eux, faites comme on vous a cy-devant ordonné, la loy de Dieu ne reçoit point d’alteration, Dieu vous a delivré de leurs mains, & les a delivrez des voſtres au milieu de la Meque, apres vous avoir donné la victoire ſur eux, il void tout ce qu’ils font, ils ont meſpriſé les commandemens de ſa divine Majeſté, & vous ont cy-devant empeſché d’aller au Temple de la Meque, ils ſont à preſent priſonniers, ſans le ſecours des vray-croyans qui eſtoient dans la ville avec eux, vous ne les euſſiez pas cognus, vous les euſſiez tous foulez aux pieds peſle meſle, & euſſiez offenſé Dieu ſans cognoiſtre voſtre peché. Dieu donne ſa miſericorde à qui bon luy ſemble, ſi vous euſſiez eſté ſeparez des infidelles, nous les aurions rudement chaſtiez. Lors qu’ils ont eſté ſecourus par les ignorans, et qu’ils ont eu quelque advantage, Dieu a mis ſon Prophete & tous les fidelles en lieu de ſeureté, ils ont eu recours à la parole de force & de vertu : en quoy ils ont mieux fait que les infidelles, Dieu ſçait tout. Aſſurément le ſonge du Prophete de Dieu a eſté veritable lorſqu’il a ſongé que vous eſtiez dans le Tem-
