| 568 | L’ALCORAN. |
mes mettent en evidence, & tout ce qu’il tiennent ſecret, il ſçait toute choſe. C’eſt luy qui a crée la Terre & les Cieux en ſix jours & s’eſt : aſſis en ſon troſne, il ſçait tout ce qui entre dans la terre & tous ce qui en ſort, il ſçait tout ce qui deſcend du Ciel & tout ce qui y monte, il eſt avec vous en quel lieu que vous ſoiez, & void ce que vous faites, le Royaume des Cieux & de la Terre eſt à luy & toutes choſes luy obeiſſent : Il fait entrer la nuit dans le jour, & ſçait ce qui eſt dans le cœur des hommes. Croyez en Dieu & en ſon Prophete, depenſez en œuvres pies quelque partie des biens qu’il vous a donnés, il vous en donnera davantage ; Faites du bien abondamment à ceux qui croiront en ſa loy Pourquoy ne croirez-vous pas en Dieu & en ſon Apoſtre qui vous enſeigne les commandemens de voſtre ſeigneur ? Vous luy avez promis d’embraſſer ſa loy, il a inſpiré tes commandemens à ſon ſerviteur pour vous faire ſortir des tenebres, & vous conduire à la lumiere, il eſt clement & miſericordieux. Qui vous empeſche de faire quelque depenſe pour ſa gloire ? l’heredité des Cieux & de la Terre eſt à luy, ceux qui ont fait quelque depenſe pour ſon ſervice avant la priſe de la Meque, ne ſont pas egaux en merite à ceux qui ont combattu pour conquerir cette ville, ils ſont un grand degré au deſſus de ceux qui n’ont pas combatu & ſeront protegez par ſa divine Majeſté, il promet le Paradis aux gens de bien, & ſçait tout ce que vous faites ; qui ſera celuy qui luy preſtera quelque aumoſne ?
