« Proensa e Tholosa e Montalba rendent ;
« E poih foron lhivrat a mort e a turment
« Al pejor enemic e de pejor talent :
« An Simon de Montfort quels lhia e los pent,
« Els destrui els abaicha, que merces no lh’en prent ;
« E pos se foron mes el teu esgardament
« So vengutz a la mort e al perilhament.
« Ez ieu meteis, ric senher, per lo tieu mandament
« Rendel castel de Foih ab lo ric bastiment.
« El castels es tant fortz qu’el mezeis se defent ;
« Ez avia i pa e vi, pro e carn e froment,
« Ez aiga clara e dousa jos la rocha pendent,
« E ma gentil companha e mot clar garniment,
« E nol temia perdre per nulh afortiment ;
« E sap ol cardenals, si m’en vol far guirent.
« Si cum eu lo lhivrei qui aital nol me rent
« Ja nulhs om nos deu creire e nulh bel covenent ! »
Lo cardenals se leva e respondec breument,
E venc a l’apostoli e dig li belament :
« Senher, so quel coms ditz, de sol .I. mot no i ment,
« Qu’ieu receubil castel el lhivrei verament ;
« E la mia prezensa i mes son establiment
« L’abas de Sent Tuberi.
« L’abas de Sent Tuberi es pros e gent a[i]bitz,
« El castels es mot fortz e ben e gent garnitz,
- ↑ — 3250. Il n’est guère possible de faire entrer ce vers dans le discours du cardinal ; il est probable au contraire qu’il manque ici quelques vers dont le sens était que l’abbé de Saint-Tibéry prit la parole pour confirmer le dire
— 3248. Vers trop long ; suppr. son ?