« No devon aver perdre ni sofrir passio. »
Tant parleron ensemble tro pres la vila so.
Ab tant vec vos l’ivesque ponhen ad espero :
Intran per las carreiras ab benedictio,
E en apres los manda, los prega els somo :
« Baro, ichetz la fora al comte car e bo ;
« E pos Dieus e la Gleiza et eu vos n’ei fait do
« Bel devriatz recebre ab gran processio ;
« Que si vos be l’amatz auret[z] ne gazardo,
« En est segle e en l’autre vera confessio ;
« Que re no vol del vostre, ans vos dara del so,
« Et en la sua garda penretz milhorazo.
— Senhors, » so ditz l’abat de Sent Cerni, « razo
« Dit[z] mosenher l’ivesque, e perdetz lo perdo ;
« E anatz ental comte recebrel seu leo,
« Que la sua mainada s’albergue a bando
« Per los vostres albercs, e nol digat[z] de no.
« E tinetz lor la venda ab bona lhivrazo,
« Que ja nous faran tort lo valent d’un boto. »
Ab aitant s’en ichiro la fora el campo ;
Sel que non ac caval lai anec a peo.
Mas per tota la vila veus venir .I. resso
Que lor dit[z] e lor monstra per bona enquestio :
« Baro, car von tornatz suavet a lairo,
« Quel coms demanda ostatges e vol c’om los li do ;
— 5071. Corr. Intra ? — 5075. processio, ms. professio. — 5088. Réd. en pr. Et adonc, ainsin que lodit pople salia per anar a l’andevan deldit comte, sas gens intravan fila a fila, et ainsin que lodit poble venia ny arribava devers lodit comte, les fasia prendre et liar, ainsi que enpres era entre lodit comte et evesque. (p. 79). — 5091. von semble mieux convenir au sens que non, leçon de Fauriel. Le ms. permet l’une et l’autre lecture. — 5092. Ms. Quels.
