« Que vos de re no fossatz forsat ni pecador,
« E qu’ieu vos pogues metre en la gran resplandor
« On estan li apostol e li sant confessor.
« E si voletz recebre esperit e lugor
« Monstrar vos ei la via on anetz al santor :
« Prec vos quem detz poder em fassatz esta honor
« Qu’entre vos e lo comte meta patz e amor ;
« Ses aver e ses terra e ses cors perdedor
« Meteus en son poder, e ses tota paor,
« E queus am eus perdo el tengat[z] per senhor.
« Si negu n’i avia ab cor cambiador
« Qu’el ni sa senhoria li fes nulha paor,
« Senes tota paor se puesca ir alhor. »
Ez eli respondero : « Senher, per bona amor,
« Car vos avem per paire e per governador,
« Trazem vos per guirent e per coselhador.
« Pregam vos per dreitura e per lo Redemptor
« Sins donatz bon cosselh o fariam folor ?
— Baros, » so ditz l’ivesques, « Dieu von trac ad auctor
« E la verges Maria el cors sent Salvador
« E trastotas mas ordes e l’abat el prior,
« Qu’eu vos do bon cosselh, que anc non de[i] milhor.
« E si el reus fazia qu’ieu n’auzissa clamor,
« Puichas n’auriatz Dieu e mi defendedor. »
Aisi son las paraulas empresas entre lor ;
Mas entre grat e forsa son el latz corredor,
Car sempre li avesque en Gui s’en van am lor
Dreitament ental comte.
Cant ilh viro lo comte creis la ira e l’efretz.
