Ab la gent de sa terra que el a amenada ;
P. Bermons d’Enduza ; e ges tro a la vesprada
Nous auria retrait ni tro a la maitinada
Aisels que de Proensa vengro a la crozada,
Estiers la autra gent que i era amasada,
Que per home del mon no pot estre aesmada,
Ses la cavalaria que ja no i er comtada
Que amenon li Frances.
La ost fo meravilhosa e grans, si m’ajut fes :
.XX. melia cavaliers armatz de totas res
E plus de .CC. melia que vilas que pages ;
En cels no comti pas ni clergues ni borzes.
Tota la gens d’Alvernhe, e de lonh e de pres,
De Bergonha e de Fransa e de Lemozines ;
De tot le mon n’i ac : Alamans e Ties,
Peitavis e Gascos, Roergas, Centonges.
Anc Dieus no fe nulh clerc per punha que i mezes
Los pogues totz escriure e dos mes o en tres.
Lai es tota Proensa e trastotz Vianes :
Dels portz de Lombardia tro aval a Rodes
I vengro tug essems pel perdo que grans es :
Lor senheiras levadas s’en aneron espes.
No cujon trobar ome en trastot Carcasses ;
Tholoza cujan pendre mas acordada s’es ;
Carcassona pendran, so dizon, e Albiges.
- ↑ — 279-99. Cette énumération manque dans la réd. en prose.
ques so al, lecture de Fauriel, n’offre aucun sens. — 275. amasada l’s a été gratté et surchargé ; on pourrait presque lire amacada.
