E dedins e defora cadaüs s’afortis ;
Mas tals es lo damnatges e lo mals el traïs
Que mans dias estero que degus no[l]s requis
Tro foro a la Pasca.
Cant foro a la Pasca venc la gentils sazos,
E es ichitz de l’ost n’Amaldric en Guios,
El coms el cardenals e mot d’autres baros
Cosselhavan ensemble e parlan a rescos.
« Senhors, » so ditz lo coms, « grans es la messios
« Qu’ieu fas en aquest seti e pert mos companhos ;
« E estau noit e dia pessius e cossiros,
« Car ieu no posc atendre las promessas els dos.
« E totz crestianesmes deu esser vergonhos
« Car omes senes armas son defendens a nos.
— Coms, » ditz lo cardenals, « no siatz temeros,
« Qu’ieu ei trames pel setgle los prezics els sermos ;
« Ez a la Pentecosta, ab lo temp[s] amoros,
« Vindra crestianesmes e predicatios,
« E de terras estranhas tant grans processios
« Que de solas gazarmas e de bels capairos
« E de capels de feutre e de gans ab bordos
« Lor omplirem las lissas els fossatz els fondos,
« E nos prendrem la vila e recebret[z] la vos,
- ↑
— 7155. Réd. en pr. Et quand lodit C. de M. a vist que per lora no podia fa res plus, de consentimen de toutas sas gens ledit sety an levat, et cascun s’es retirat lo melhor que a pogut a causa de l’iver, et a passat lodit hiver de cascun cartier sens fa aucuna causa, sinon que los de la vila an faitas qualques petitas fortaressas (p. 96). — 7173. Ms. E de las t. e.
