Si feri un arquier quel partic los renhos,
Qu’el cors li mes la’nsenha e la lansa el penos,
Si qu’en remas vermelha la erba el sablos.
E lo coms de Montfort qu’es mals e orgulhos
Feric ins en la preissa si qu’en abatec dos.
En tantas de partidas lo feron pels giros
Que sos cavals trabuca e debriza l’arsos,
E el chai a la terra e remas els talos,
E defen e trastorna e remonta el ros.
Ins en la major preissa es W. Arnaudos,
Forsatz e retengutz, mas el es tan ginhos
Ques laisec a la terra cazer da genolhos ;
Mas per lor de la vila es aitant ben rescos
Que i perdec son caval e repairec al[s] sos.
Al partir de la guerra n’i a tans d’engoichos,
Car ilh dedins perderon W. P. de Mauros,
El Lobs de Fois nafratz e mot d’autres baros,
El camp de Montoliu, el vergier perilhos,
On remas cada dia lo blancs el vermelhos ;
Mas la sanc el cervel e la carn els brazos
E la flors e la folha e lo fruit doloiros,
De que mant olhs mirable es remazut ploros.
E lo coms s’en repaira trist e fel ez iros,
E a dit per felnia : « Jhesu Crist glorios,
« Senher, on es mos astres que sol estre tan bos
« E tant cars e tant dignes e tant aventuros,
« Que per mar e per terra s’espandial resos ?
« Anc no cudei vezer que fos tant aleitos,
« Que nom valguessan armas ni sant ni orazos.
— 7279. Réd. en pr. Guiraud de Moros. — 7282. remas, corr. renais ? — 7285. La phrase semble incomplète, ou faut-il au v. 7284 corriger E en Es ? cf. v. 7148.
