« Quens guida ens governa, e fa nos a parvent.
« E per so que hom conosca lo nostre afortiment,
« E que la noit el dia lor estem sus la dent,
« Nos creisserem la vila de novel creissement,
« E bastirem per forsa tot lo vielh bastiment,
« E farem i tal obra e tal afortiment
« Que nos perdrem temensa, e ilh siran tement. »
Ditz n’Dalmatz de Creissil : « Vos dizet[z] be e gent,
« Que per esta creguda valdrem mais per .I. cent,
« En sirem pus delhivre e milhor combatent.
— Senhor, » ditz en Pelfort, « senes tot falhiment,
« Nos e tota la vilan prendrem milhurament,
« E n’estarem trop melhs e pus segurament ;
« E ges no podem far milhor amparament :
« E nom de Jhesu Crist comensem o breument. »
Ladoncas van a l’obra aisi cominalment
Quels paires ni las maires ni li filh nilh parent,
L’us no espera l’autre, nil paubres lo manent.
Pero Rotgers Bernartz bastil comensament,
E feron las clausuras el mur el fundament,
Els fossatz e las lhissas els dentelhs defendent.
Mas per tota la vila levan l’esbaudiment,
E dizen l’us a l’autre : « Dem nos alegrament !
« Qu’en Arnaut es intratz de Vilamur valent,
« Que a bon cor e forsa, valor e escient ! »
E lo coms de Montfort fe ajostar sa gent,
Que foro ben .C. .M., que cadaüs l’entent,
E mostret lor Tholoza e l’apertenement :
— Senhors, » so ditz lo coms, « vec vos la sobredent
« De tot crestianesme e de tot salvament.
— 7436. Ms. perdram. — 7454. Ms. f. e v.
