Pero cil de la vila son durament defes ;
E lo coms de Montfort qu’es mals en totas res,
Ab mot bela companha s’es ins en l’aiga mes,
Ez ab genh et ab forsa les a tant sobrepres
Que l’autra torr a preza e lo pont a malmes,
E mes hi sa senheira el leo els aurfres.
Elh baro de la vila los an molt be comes,
Per aiga e per terra, cavalers e borzes ;
El pobles elh sirvent se son tant entremes
Que sus el cap del pont an .I. peirer asses,
Et ab peiras redondas ez am cairels turques
Los nafran els debrizan soendet e espes.
En tantas de maneiras los an aisi repres
Que senes grat, per forsa, son de la tor deches,
Et an la desparada ez an laïns foc mes.
E[l] nautor de la vila que son bo e cortes
Corron per tota l’aiga, e en lonc e en tes,
E sercan las ribeiras e perprendol paes,
E meto y las viandas e los conduitz el bes.
Ab tant cil de la vila e Braimans e Ties
Prendols brans e las massas e los bos arcs turques,
Ez an passada l’aiga .C. e .LX. e tres.
Cels de l’ost los remiran, cavalers e pages.
Adoncs escridan Joris de las tendas on es :
« En P. de Vezis, senher, mal nos es pres,
« Que l’ome de la vila se son contra nos mes ! »
E corro a las armas e als cavals mores,
quand se son estats fugits, lo C. de M. an los vaissels es anat dona l’assault a l’autre tour de S. Subra, laquala tenian los de la vila, coma dessus es dit, et talamen an fait que les n’an faits salir ; et els son intrats dedins, et an metut a bas le reste del pont que anava vers la vila (p. 99). — 7981. mes, ms. mel.
