Ladoncs sonan li graile e li corn a sonetz,
E corro a las cordas e tendols trabuquetz.
Els baros de Capitol portan los bastonetz,
E lhivran las viandas els bels dos els larguetz ;
E lo pobles aporta pics, palas e espleitz,
E no i remas nulh autz ni cunhs ni marteletz
Ni semal ni caudeira ni cuba ni paletz.
E comensan las obras els portals els guisquetz ;
Cavalers e borzes recebrols caironetz,
E donas e donzelas e tozas e tozetz,
E donzelas piuzelas, li gran els menoretz,
Que cantan las baladas e cansos e vercetz.
Mas li peirer defora lor gietan mantas vetz,
E li arc e las frondas, peiras e caireletz,
Que dels caps lor abato orzols e grazaletz,
E lor rompon las manjas e los cabessaletz,
E passan per las cambas e pels mas e pels detz ;
Mas tant an los coratges e bos e fortaletz
C’us no s’en espaventa.
Us no s’en espaventa, ans lor agrada els platz
Que fassan las garidas per defendrels fossatz.
Ez obret ab gran joya total cominaltatz.
Mas li peirier defora ab los arcs asesmatz
Lor gietan tantas peiras e cairels empenatz
Que cazon e la preicha e lor feron de latz,
E passan per las cambas e pels pieitz e pels bratz,
Que bancs e traus e lissas hi hac ameitadatz.
- ↑ — 8190. Ms. tota la.
— 8186. fortaletz, corr. fortz e letz ?