Page:La Chanson de la croisade contre les Albigeois, 1875, tome 1.djvu/345

[1218]

333

croisade contre les albigeois.

Mas lo filhs de la Verge les te aseguratz,
Que dedins en la vila no n’a gaires dampnatz.
El coms de Montfort a sos cavaliers mandatz,
Los pus valens del seti e los melhs esproatz,
8200E fe bonas garidas ab los frontals cledatz,
E mes hi sas companhas e cavalers armatz
Ben garnitz de las armas, ab los elmes lassatz ;
Ez amenan la gata belament e viatz.
E laïns en la vila son be asabentatz,
8205Ez an los trabuquetz tendutz et atempratz,
E mezon en las frondas los bels cairos talhat[z],
Ez alargan las cordas e venon abrivatz,
E fero si la gata pel pieitz e pels costatz,
Els portals e las voutas els giros entalhatz,
8210Qu’en mantas de maneiras en volon li asclatz,
E de cels que la menan n’i laissa de versatz.
E per tota la vila escridan az un clatz :
« Per Dieu, na falsa gata, jamais no prendretz ratz ! »
E lo coms de Montfort es tan fel e iratz
8215En auta votz escrida : « Dieus, per que m’aziratz ?
« Senhors, » so ditz lo coms, « cavalers, esgardatz
« Esta dezaventura, ni com soi encantatz,
« Quez ara nom val Glieiza ni saber de letratz,
« Ni nom ten pro l’avesques ni nom val lo legatz,
8220« Ni nom te pro valensa ni nom val ma bontatz,
« Ni nom tenon pro armas, ni sens ni larguetatz
« Qu’ieu per fust o per peira no sia rahuzatz ;
« Car ieu cujava estre tant be aventuratz
« Que per aquesta gata fos preza la ciutatz :
8225« Ara no sai quem diga ni re no sai quem fatz.
— Senher [coms], » ditz Folcaus, « en als vos percassatz,
« Que jamais esta gata no valdria tres datz ;