E tiravan la donas e tozas e molhers,
E venc tot dreit la peira lai on era mestiers
E feric si lo comte sobre l’elm qu’es d’acers
Quels olhs e las cervelas els caichals estremiers,
El front e las maichelas li partic a cartiers ;
El coms cazec en terra mortz e sagnens e niers.
Cela part esperonan Gaucelis e n’Aimers,
Ez an cubert lo comte coitos e scienters
Ab una capa blava, e crec l’espaventers.
Ladoncs auziratz planher tans baros cavalers,
E planher sotz los elmes e direls reproers !
En auta votz escridan : « Dieus, non est dreiturers,
« Car tu la mort del comte nil dampnatge sofers :
« Ben es fols qui t’ampara ni es tos domengers ;
« Quel coms qu’era benignes e ben aventurers
« Es mortz ab una peira cum si fos aversers.
« E mas los teus mezeiches deglazias e fers,
« Jamais en esta terra nos non aurem mesters. »
Ab tant po[r]tan lo comte al[s] clergues legendiers ;
El cardenals e l’abas e l’evesques Forquiers
Lo receubron ab ira, ab crotz e ab essesiers.
E laïns en Toloza intrec us messatgers
Quels comtec las noelas, es es tals l’alegriers
Que per tota la vila corron ves los mostiers,
Ez alumnan los ciris per totz los candelers,
Ez escridan la joy a, car es Dieus merceners,
Car Paratges alumpna es er oimais sobrers,
El coms qu’era malignes e homicidiers
Es mortz ses penedensa, car era glaziers.
corr. el sobrier ou el solier ? — 8456. Aimer ne convient pas à la rime ; corr. Rainer ? — 8459. Ms. tant. — 8460. Corr. E plorar ?
