Cant foron al dimenge, es torbatz l’elemens ;
El vens e la tempesta e l’aura el turmens
S’espandish per las terras e brandish la semens.
Els baros de Tholoza e lo pobles jauzens
Establiron las gaitas per los establimens,
Ez intran per la vila manjar cominalmens.
E laforas el seti es faitz lo parlamens,
E cujan be la vila prendre seguramens ;
Ez en petita d’ora es lo comensamens,
Que sobre las carretas meton los ichermens,
E lo foc e la lenha e las falhas ardens,
E menan las carretas a la vila correns,
Que al fossat de la vila es lo retenemens,
Que la palha s’alumpna e lo focs espandens.
E las gaitas escridan toi engoichozamens
Que per tota la vila es levatz l’espavens ;
E corro a las armas sempre viassamens :
No i remas filhs ni paire ni nulhs hom defendens,
Ni cavalers ni comtes ni cozis ni parens ;
Tuit n’ieicho per las portas a milhers e a cens,
E perprendo las plassas els apertenemens.
Las donas e las femnas, las tozas avinens,
Portan l’aiga e la peira, remembrans e dizens :
« Santa Maria dona, hoi nos siatz guirens ! »
E cilh de las carretas s’en tornero fugens.
- ↑ — 8549. Ms. trobatz. — 8558. Réd. en pr. et tot incontinen an faict venir una grand quantitat de carretas, et an las cargadas de palha, yssirmen et autre bagatge (p. 103).
