« E tot crestianesme aflamar e brandir,
« Si que fassam los pobles levar e enardir,
« Que negus no i remanga que si sapja garnir ;
« E porton crotz e glazi per lo rei a seguir.
« Ez a la Pentecosta dic vos be ses mentir
« Que veiret[z] tals crozadas e tantas gens venir
« Que pro fara la terra si los pot sostenir,
« Ab que poirem Toloza del tot apoderir ;
« E farem ne tals obras, cant vindra al partir,
« Que negus hom nons auze contrastar ni grondir.
— Senher, » so ditz l’avesques, « ieu ai cor e dezir
« Cum an aquest messatge acabar e furmir.
« Ez es mal e salvatge e estranh per auzir,
« E fas me meravilhas Dieus cum pot cossentir
« La mort del sieu filh digne quel solia servir.
« Mas pero, per natura e segon qu’ieu m’albir,
« Autre paire s’irascra cant vis so filh morir ;
« Mas Dieus no fa semblansa quel sia greu nil tir,
« Que cant lor degra aucire fa nos dezenantir.
« E car nos fa Toloza trebalhar e languir,
« Anem sercar tal metge que nos poscha guerir ;
« E car Dieus so oblida nos pessem del merir,
« Que si en nulha maneira nos podion gandir
« Ni en cel ni en terra escapar ni fugir,
« Jamais nos ni la Gleiza no i poirem revenir. »
Ditz lo coms n’Amaldrics : « Senhors, beus dei grazir
« Car la mort de mon paire voletz tant car merir.
— Senhors, » so ditz lo coms de Saischo, « ieu voilhir
« Ab tota ma companha, e pos vos aitant dir,
« Si m’en voliatz creire, per lo dreg azumplir,
« Diirai vos cum poiriatz de gran trebalh ichir :
« Si la Gleizas volia ab merce adossir,
Page:La Chanson de la croisade contre les Albigeois, 1875, tome 1.djvu/365
Le texte de cette page a été corrigé et est conforme au fac-similé.
[1218]
353
croisade contre les albigeois.
