« Ez ab lor de Tholoza on es ma fizaltatz,
« Ez ab Bertran mo fraire qui n’es aparelhatz
« Vos irai si socorre ans que gairels sufratz,
C’al partir de la guerra ne remandrem ondratz.
— Senhors, » so ditz lo coms, a per so no temiatz :
« O de mort o de vida, cal que vos la fassatz,
« Mort o viu o delhivre me trobaretz de latz,
« Que d’aquesta batalha soi aisi acordatz
« Qu’ieu i perdre[i] la vida o remandre[i] ondratz.
« E lo filhs de la Verge qui fo martirizatz
« Conosca la dreitura e vejals lors pecatz ! »
So ditz lo coms de Foish : « For[t] be e gent parlatz,
« E pessem del dampnatje com sia comensatz,
« E fassam los cometre al melhs encavalgatz. »
So ditz Rogers Br. : « Totz los asabentatz.
« Que si negus falhia en aisso que mandatz,
« Per totz temps tan cant viva sia dezeretatz.
— Senhor, » ditz P. Navar, « cavaler, tug gardatz
« Lo cors del comte jove que no i sia nafratz,
« Que totz Pretz e Paratges es en lui restauratz,
« Ez es morta valensa si el era mescabatz. »
El Lops de Foish escrida : « Senh’en coms, enansatz :
« Cavalguem la batalha, que lo temps es passatz ! »
N’Arnaut de Vilamur es demest totz triatz,
En Guiraus de Gordo, n’Ucs d’Alfar e l’Abatz,
En Bertrans de la Islha, n’Garcias Coradiatz,
En W. en R. Unautz ben assesmatz,
Ramon A. del Pog, el tinhos dels juratz,
— 9069. La réd. en pr. ajoute : et lo comte de Cumenge an l’autra gen faran la batalha (p. 106) ; cf. la note sur le v. 9105. — 9087. Réd. en pr. ung valent home apellat le Lop de Foix (p. 106). — 9093. Sic.