Lo vescoms de Bezers s’es la noit ben gaitetz,
A l’alba pareichant s’es al mati levetz ;
E li baro de Fransa, can se foron disnetz,
Se son per tota l’ost cominalment armetz ;
E cels de Carcassona se son aparelhetz.
Lo jorn i ac mans colps e feritz e donetz,
E d’una part e d’autra mortz e essanglentetz ;
Motz crozatz i ac mortz e motz esglazietz,
E de dins aichament trop mortz e trop nafretz.
Mais li baron de l’ost se son tant e[s]forsetz
Que lo borc lor an ars trastot tro la ciptetz ;
Es an los aisi fort entorn revironetz
Que l’aiga lor an touta qu’es Audes apeletz.
Peireiras e calabres an contral mur dresset[z]
Quel feron noit e jorn, e de lonc e de letz.
Aujatz quinha vertut i fe donc Domni-Dieus :
Que li arcbalestiers qui eran el[s] tors montetz,
Can cujan en l’ost traire no i vait l’una maitetz :
Li cairel de lor arcs lor cason els fossetz.
- ↑ — 576-82. Ces traits sont conservés dans la réd. en pr., très-arrangée pour toute cette partie : l’auteur, après avoir supposé que les croisés avaient éprouvé un premier échec, continue ainsi : Et adonc es estat deliberat entre els que, vist lo grant mal et domage qu’els avian pres per los de la cieutat, que per prendre venjansa del dit mal, qu’els yrian l’endema destruire tout lo borc deldit Carcassona et metre lo fuoc pertout, et cramar jusques al pe de la dita cieutat, et an aquo lor ostar l’aygua ; laquala causa fouc faita ainsin que fouc devisada ne dicta, que fouc un grant doumatge et destruction, et aldit borc, loqual fouc tout ars et demolit .... Adonc an fait dressar peyries e calabres... (p. 12). Puis l’auteur passe immédiatement à la venue du roi d’Aragon (ci-après 597 ss.).
