Certas eu auzi diire, e sai qu’es veritetz,
Que anc corbs ni votors ni auzels c’anc nasques
No volet en la ost en tot aisel estetz ;
E poichas de vitalha i ac si a plantetz
Donec om .XXX. pas per .I. denier monedetz.
La sal del sali prendon e aqui l’an cargetz,
E aqui restaureron so don son mescabetz :
S[i] el pa an perdut en aquo an gazanhetz ;
Mas nulhs non al cabal, so sapchatz, recobretz,
Ans cug que plus lor cost.
So fo en aquel mes c’om apela aost
Que fo a Carcassona trastot entorn la ost.
Lo reis P. d’Arago i es vengutz mot tost
Ab lui .C. cavaliers qu’amena a son cost ;
Cels de la ost se dinnan e mangen carn en rost.
Can los viro venir no so mia escost,
Ans aneron vas lui li princeps elh prebost.
Il los saludet gent ; il li an gent respost :
« Be siatz vos vengutz. »
En un prat desotz l’aiga e latz .I. boi folhut
Ac lo coms de Toloza son riche trap tendut.
Lai es mosenhel reis e li seu dechendut,
Que son de Catalonha e d’Aragon vengut.
