Can lo coms de Monfort c’om apela Simon
Romas a Carcassona sos companhos somo :
Wles de l’Encontre, cui Domni-Dieus ben don !
Trames en Bederres, car no i avet prodom
Que melhs saubes gardar ni castel ni domnon,
Ni una rica ciutat ni plus en aviron.
Certas, si Portegals nil regnes del Leon
Fossan en sa comanda ni en sa subjection
Sin sereit capdeletz, si Jhesu Crist bem don,
Melhs que non es en cels que son fol e bricon,
Que son reis del païs, e nol[s] pretz .I. boton.
Lambert cel de Creissi el trames a Limon
E dels autres baros, qui aval qui amon,
Per la terra gardar en lai on li saub bon.
E lo coms de Monfort qui a cor de leon
Remas a Carcassona e garda e[n] sa prizon....
E lo vescoms mori apres de menazon ;
E li malvatz tafur e li autre garson
Que no sabon l’afaire co si va ni co non,
So dizo qu’om l’aucis de noitz a traicion :
El coms no o cosentira, per Jhesu Crist del tron,
Per nulha re c’om sapcha ni sia en est mon
Que hom l’agues aucis.
- ↑ — 848. Verles d’Encontre, ici et ailleurs dans la réd. en pr. C’est une mauvaise lecture de l’abréviation du ms. Il y a Guilhenmes au v. 1134. — 861. Il faut supposer ici l’omission d’un vers où devait se trouver le régime de garda. La réd. en pr. est à cet endroit trop libre pour apporter aucun secours.
